புதுடெல்லி: ஜந்தர் மந்தரில் கரப்பான்பூச்சி ஜனதா கட்சி நடத்திய போராட்டத்தின்போது நிகழ்ந்த வன்முறை மற்றும் காவல் துறை அத்துமீறல்கள் குறித்து விசாரிக்க அமைக்கப்பட்ட உயர்மட்ட விசாரணைக் குழுவிடம் பாதிக்கப்பட்டவர்கள் தரப்பில் புகார்கள் ஏதும் அளிக்கப்படவில்லை என்று உச்ச நீதிமன்றத்தில் தெரிவிக்கப்பட்டுள்ளது. டெல்லி ஜந்தர் மந்தரில் ஜூலை 20 அன்று நடைபெற்ற போராட்டத்தின்போது நிகழ்ந்த வன்முறை மற்றும் காவல்துறை அத்துமீறல்கள் குறித்த புகார்களை விசாரிக்க உச்ச நீதிமன்ற முன்னாள் நீதிபதி ஆர்.சுபாஷ் ரெட்டி தலைமையில் விசாரணைக் குழு அமைக்கப்பட்டது. இந்த குழுவில், பஞ்சாப் மற்றும் ஹரியானா உயர் நீதிமன்றத்தின் முன்னாள் தலைமை நீதிபதி ரவி சங்கர் ஜா, டெல்லி உயர் நீதிமன்ற முன்னாள் நீதிபதி ஷலிந்தர் கவுர், மத்திய புலனாய்வு அமைப்பின் (சிபிஐ) முன்னாள் இயக்குநர் ரிஷி குமார் சுக்லா, மேகாலயாவின் ஓய்வுபெற்ற காவல்துறை இயக்குநர் ஜெனரல் எல்.ஆர். பிஷ்னோய் ஆகியோர் இடம்பெற்றுள்ளனர். சிஜேபி தலைமையில் நடைபெற்ற இந்த போராட்டத்தின்போது மாணவர்கள் மீது காவல் துறை அதிகப்படியான பலத்தைப் பயன்படுத்தியதாகக் குற்றம் சாட்டி தாக்கல் செய்யப்பட்ட பல மனுக்களை விசாரித்த உச்ச நீதிமன்றம், கடந்த ஆகஸ்ட் மாதம் இந்த குழுவை அமைந்தது. இந்த போராட்டத்தின்போது காவல்துறையினரும் வன்முறைக்கு உள்ளானதாகக் குற்றச்சாட்டுக்கள் எழுந்தன. இந்நிலையில், டெல்லி ஜந்தர் மந்தரில் ஜூலை 20 அன்று நடைபெற்ற போராட்டத்தின்போது நிகழ்ந்த வன்முறை மற்றும் காவல் துறையின் அத்துமீறல்கள் குறித்த புகார்களை விசாரிக்க அமைக்கப்பட்ட குழுவிடம், பாதிக்கப்பட்டவர்களிடம் இருந்து மிகக் குறைவான புகார்களே வந்துள்ளதாகவும், இதனால் இதுவரை எந்த முடிவுக்கும் வர முடியவில்லை என்றும் உச்ச நீதிமன்றத்திடம், உயர்மட்ட விசாரணைக் குழு தெரிவித்துள்ளது. நாடு முழுவதும் உள்ள 149 செய்தித்தாள்களில் விசாரணைக் குழு அறிவிப்புகளை வெளியிட்டிருந்தது. அதில், வன்முறை தொடர்பான புகார்களை வழங்குமாறு பொதுமக்களுக்கும் காவல் துறை அதிகாரிகளுக்கும் அழைப்பு விடுக்கப்பட்டிருந்தது. இவ்வளவு விரிவான விளம்பரத்துக்குப் பிறகும், இணையதளம் மூலமாகவோ அல்லது நேரடியாகவோ புகார்கள் ஏதும் வரவில்லை என்று தலைமை நீதிபதி சூர்ய காந்த், நீதிபதி ஜாய்மால்யா பாக்சி ஆகியோர் அடங்கிய உச்ச நீதிமன்ற அமர்விடம் விசாரணைக் குழு தெரிவித்துள்ளது. மேலும், அக். 21 அன்று மீண்டும் ஒரு வேண்டுகோளை விடுத்ததாகவும், புகார்களை சமர்ப்பிப்பதற்கு வசதியாக தங்கள் இணையதள முகவரியை வழங்கி இருந்ததாகவும் உயர்மட்ட விசாரணைக் குழு நீதிமன்றத்தில் தெரிவித்துள்ளது. ஆதாரங்கள் போதிய அளவில் இல்லை என்பதை கருத்தில் கொண்ட உச்ச நீதிமன்றம், ஜூலை 20 அன்று நடந்த சம்பவம் தொடர்பான மனுக்கள், காணொளிப் பதிவுகள் மற்றும் புகார்களை ஆய்வுக்காக விசாரணை ஆணையத்திடம் ஒப்படைக்குமாறு உத்தரவிட்டது. மேலும், இடைக்காலக் கண்டுபிடிப்புகளை அவ்வப்போது நீதிமன்றத்திடம் சமர்ப்பிக்குமாறும் அந்த ஆணையத்துக்கு நீதிமன்றம் அறிவுறுத்தி உள்ளது.
ஜந்தர் மந்தரில் ஜூலை 20 போராட்டத்தில் போலீஸ் அத்துமீறியதாக புகார்கள் வரவில்லை: உயர்மட்ட விசாரணைக் குழு
📅
📍 Tamil Nadu, Tamil Nadu
🏷️ News
✍️ TN24 Editorial Desk
🔗 Source: hindutamil.in (original report) ↗
