புத்தகங்களை ஆய்வு செய்வதற்காக கல்லூரி நிலை, இயக்குநரக நிலை மற்றும் நிர்வாகத் துறை நிலை என மூன்று அடுக்குகளைக் கொண்ட கல்வி மற்றும் உள்ளடக்க ஆய்வு நடைமுறை பின்பற்றப்பட்டதாக அரசு தெரிவித்துள்ளது. ஜம்மு காஷ்மீரில் கல்லூரிகள் மற்றும் உயர்கல்வி நிறுவனங்களின் நூலகங்களில் இருந்த 4,249 புத்தகங்கள் “ஆட்சேபனைக்குரிய உள்ளடக்கம்” இருப்பதாகக் கூறி புழக்கத்திலிருந்து திரும்பப் பெறப்பட்டுள்ளன என்று அம்மாநில அரசு சட்டப்பேரவையில் தெரிவித்துள்ளது. இந்த நடவடிக்கை தொடர்பாக செவ்வாய்க்கிழமை சட்டப்பேரவையில் எழுப்பப்பட்ட கேள்விக்கு உயர்கல்வித் துறை அமைச்சர் அளித்த பதிலில், இதுவரை 21,81,582 புத்தகங்கள் மற்றும் பிற வெளியீடுகள் ஆய்வு செய்யப்பட்டுள்ளதாக தெரிவிக்கப்பட்டது. இந்த ஆய்வில் காஷ்மீர் பிரிவில் 12,48,641 புத்தகங்களும், ஜம்மு பிரிவில் 9,32,941 புத்தகங்களும் இடம்பெற்றுள்ளன. திரும்பப் பெறப்பட்ட 4,249 புத்தகங்களில் 3,996 புத்தகங்கள் காஷ்மீர் பிரிவைச் சேர்ந்தவை; 253 புத்தகங்கள் ஜம்மு பிரிவைச் சேர்ந்தவை என அரசு தெரிவித்துள்ளது. இதன்படி, திரும்பப் பெறப்பட்ட புத்தகங்களில் சுமார் 94 சதவீதம் காஷ்மீர் பிரிவைச் சேர்ந்தவையாக உள்ளன. இந்த விவகாரம் லங்காட் தொகுதி சட்டமன்ற உறுப்பினரும், அவாமி இத்தேஹாத் கட்சித் தலைவருமான ஷேக் குர்ஷீத் எழுப்பிய கேள்வியின் மூலம் சட்டப்பேரவையில் வெளிச்சத்துக்கு வந்துள்ளது. கல்லூரிகள் மற்றும் நூலகங்களில் உள்ள புத்தகங்களை ஆய்வு செய்வதற்காக தெளிவான மற்றும் புறநிலை அளவுகோல்கள் பின்பற்றப்பட்டுள்ளனவா, எந்த அடிப்படையில் புத்தகங்கள் “ஆட்சேபனைக்குரியவை” என வகைப்படுத்தப்பட்டன என்பது குறித்து அவர் கேள்வி எழுப்பியிருந்தார். இதற்கு பதிலளித்த அரசு, உயர்கல்வித் துறையின் 2026-ம் ஆண்டு ஜூலை மாத சுற்றறிக்கையில் குறிப்பிடப்பட்டுள்ள வழிகாட்டுதல்களின் அடிப்படையில் புத்தகங்கள் ஆய்வு செய்யப்பட்டதாக தெரிவித்துள்ளது. இந்த செய்தியை ஆங்கிலத்தில் படிக்க இங்கே க்ளிக் செய்யவும் மூன்று அடுக்குகளில் புத்தகங்கள் ஆய்வு புத்தகங்களை ஆய்வு செய்வதற்காக கல்லூரி நிலை, இயக்குநரக நிலை மற்றும் நிர்வாகத் துறை நிலை என மூன்று அடுக்குகளைக் கொண்ட கல்வி மற்றும் உள்ளடக்க ஆய்வு நடைமுறை பின்பற்றப்பட்டதாக அரசு தெரிவித்துள்ளது. புத்தகங்களின் கல்விசார் பொருத்தம், உண்மைத்தன்மை, கற்பித்தலுக்கான பயன்பாடு உள்ளிட்ட அம்சங்கள் மதிப்பீடு செய்யப்படுவதுடன், அவற்றின் உள்ளடக்கம் இந்திய அரசியலமைப்பு, நடைமுறையில் உள்ள சட்டங்கள், பல்கலைக்கழக மானியக் குழு விதிமுறைகள், அரசின் கொள்கைகள் மற்றும் உயர்கல்வித் துறையின் கல்வி நோக்கங்களுடன் ஒத்துப்போகிறதா என்பதும் பரிசீலிக்கப்படுவதாக கூறப்பட்டுள்ளது. அரசின் விளக்கத்தின்படி, தவறான தகவல்கள், தவறாக வழிநடத்தும் தகவல்கள், தூண்டுதல் ஏற்படுத்தக்கூடிய உள்ளடக்கம், சட்டவிரோதமான அல்லது பிற வகைகளில் ஆட்சேபனைக்குரிய உள்ளடக்கம் ஆகியவை ஆய்வின் ஒரு பகுதியாகக் கருதப்படுகின்றன. குறிப்பாக பயங்கரவாதம், வன்முறைத் தீவிரவாதம், பிரிவினைவாதம், தீவிரமயமாக்கல் போன்றவற்றை ஊக்குவிக்கும் அல்லது நியாயப்படுத்தும் உள்ளடக்கங்கள் குறித்தும் கவனம் செலுத்தப்படுவதாக சுற்றறிக்கையில் குறிப்பிடப்பட்டுள்ளது. நாட்டின் இறையாண்மை, ஒற்றுமை, ஒருமைப்பாடு மற்றும் பாதுகாப்புக்கு பாதகமாக அமையும் செயல்களை நேரடியாகவோ மறைமுகமாகவோ ஆதரிக்கும் உள்ளடக்கங்களும் பரிசீலனைக்கு உட்படுத்தப்படுகின்றன என்று அரசு கூறியுள்ளது. 1,752 புத்தகங்கள் நிபுணர் ஆய்வுக்கு அனுப்பி வைப்பு ஆய்வில் இதுவரை புழக்கத்தில் இருந்து நீக்கப்பட்ட 4,249 புத்தகங்களைத் தவிர, மேலும் 1,752 புத்தகங்கள் நிபுணர் ஆய்வுக்காக கல்லூரிகள் இயக்குநரகத்துக்கு அனுப்பப்பட்டுள்ளன. இதில் 1,214 புத்தகங்கள் காஷ்மீர் பிரிவிலிருந்தும், 538 புத்தகங்கள் ஜம்மு பிரிவிலிருந்தும் அனுப்பப்பட்டுள்ளன. இதனால் புத்தகங்களின் ஆய்வு மற்றும் வகைப்படுத்தும் பணிகள் இன்னும் நிறைவடையவில்லை என்றும், இந்த நடவடிக்கை தொடர்ந்து நடைபெற்று வருவதாகவும் அரசு தெரிவித்துள்ளது. இதனிடையே, ஏற்கனவே அதிகாரப்பூர்வமாகத் தடை செய்யப்பட்ட புத்தகங்களும் இந்த எண்ணிக்கையில் சேர்க்கப்படவில்லை என்று அரசு தெளிவுபடுத்தியுள்ளது. 2025 ஆகஸ்ட் 5-ம் தேதி வெளியிடப்பட்ட S.O. 203 உத்தரவின் கீழ் தடை செய்யப்பட்ட 19 தலைப்புகளைச் சேர்ந்த 518 பிரதிகளும் தனியாக புழக்கத்தில் இருந்து அகற்றப்பட்டுள்ளதாக சட்டப்பேரவையில் தெரிவிக்கப்பட்டது. இதனால் தற்போது அறிவிக்கப்பட்டுள்ள 4,249 புத்தகங்கள் என்பது ஏற்கனவே தடை செய்யப்பட்ட புத்தகங்களிலிருந்து தனித்த எண்ணிக்கையாகும். “முழுமையான பட்டியலை அரசு வெளியிட வேண்டும்” – ஷேக் குர்ஷீத் இதற்கிடையில், அரசு அளித்த பதில் முழுமையானதாக இல்லை என்று ஷேக் குர்ஷீத் தெரிவித்துள்ளார். புழக்கத்தில் இருந்து திரும்பப் பெறப்பட்ட புத்தகங்களின் பெயர்கள், ஆசிரியர்கள், பாடப்பிரிவுகள் மற்றும் பதிப்பாளர்கள் அடங்கிய முழுமையான பட்டியலை அரசு வெளியிட வேண்டும் என்று அவர் வலியுறுத்தியுள்ளார். எந்தெந்த புத்தகங்கள் ஏன் நீக்கப்பட்டன என்பது பொதுமக்களுக்கும், கல்வியாளர்களுக்கும், சட்டப்பேரவை உறுப்பினர்களுக்கும் தெரிய வேண்டும் என்றும் அவர் கூறியுள்ளார். கேள்வி நேரத்தில் இந்த விவகாரத்தை விரிவாக எடுத்துரைக்க முடியாத நிலையில், சட்டப்பேரவை அடுத்தடுத்து கூடும்போது இதுகுறித்து மீண்டும் அரசிடம் விளக்கம் கேட்கப்போவதாகவும் அவர் தெரிவித்துள்ளார். புத்தகங்களை ஆய்வு செய்வதற்கான இந்த நடவடிக்கையின் நோக்கம், உயர்கல்வி நிறுவனங்களை கற்றல், ஆராய்ச்சி மற்றும் கல்விசார் சிறப்புக்கான மையங்களாகப் பராமரிப்பதே என்று அரசு விளக்கியுள்ளது. அதேசமயம், கல்வி நிறுவனங்களில் அரசியலமைப்பு விழுமியங்கள், கல்விச் சுதந்திரம், திறனாய்வுச் சிந்தனை, அறிவியல் மனப்பான்மை மற்றும் பொறுப்புள்ள குடியுரிமை ஆகியவற்றை வளர்க்கும் சூழல் நிலவ வேண்டும் என்றும் அரசு குறிப்பிட்டுள்ளது. புத்தக ஆய்வு நடவடிக்கை இன்னும் தொடர்ந்து நடைபெறுவதால், அடுத்தகட்டத்தில் மேலும் புத்தகங்கள் புழக்கத்திலிருந்து திரும்பப் பெறப்படுமா, நிபுணர் ஆய்வுக்கு அனுப்பப்பட்ட 1,752 புத்தகங்களில் எத்தனை புத்தகங்கள் மீது நடவடிக்கை எடுக்கப்படும் என்பது பின்னர் தெரியவரும். இதற்கிடையில், நீக்கப்பட்ட புத்தகங்களின் முழுமையான பட்டியலை வெளியிட வேண்டும் என்ற கோரிக்கை எழுந்துள்ளதால், இந்த விவகாரம் ஜம்மு காஷ்மீர் சட்டப்பேரவையில் தொடர்ந்து விவாதிக்கப்படும் சூழல் உருவாகியுள்ளது. எழுதியவர்: நவீத் இக்பால் Stay updated with the latest news headlines and all the latest Lifestyle news. Download Indian Express Tamil App - Android or iOS. Mona Pachake is a journalist and writer who studied journalism at the Asian College of Journalism, Chennai. With over four years of experience in the media industry, she has been working with The Indian Express Tamil for more than three years. She specializes in lifestyle, entertainment, and food journalism, bringing a keen eye for detail and a passion for storytelling to her work. Through her writing, Mona aims to inform, engage, and connect with readers by capturing the stories behind people, trends, and culture. இந்தக் கட்டுரையைப் பகிரவும் இந்த கட்டுரை உங்களுக்கு பிடித்திருந்தால் உங்கள் நண்பர்களுடன் பகிரவும்அவர்கள் பின்னர் நன்றி சொல்வார்கள்
ஜம்மு காஷ்மீரில் அதிரடி நடவடிக்கை; 4,249 புத்தகங்கள் புழக்கத்தில் இருந்து நீக்கம்
📅
📍 Chennai, Tamil Nadu
🏷️ News
✍️ TN24 Editorial Desk
