காதல் விவகாரத்தால் மென்பொறியாளர் கவின் செல்வகணேஷ் கொலை செய்யப்பட்ட வழக்கில் பெண்ணின் தந்தை மற்றும் தாயார் மீதான குற்றப்பத்திரிகை ரத்து செய்யப்பட்டதை எதிர்த்து தமிழக அரசு தாக்கல் செய்த மேல்முறையீட்டு மனுவை தள்ளுபடி செய்து உச்ச நீதிமன்றம் உத்தரவிட்டுள்ளது. தூத்துக்குடி மாவட்டம் ஏரல் அருகேயுள்ள ஆறுமுகமங்கலத்தைச் சேர்ந்த மென்பொறியாளர் கவின் செல்வகணேஷ், திருநெல்வேலியைச் சேர்ந்த சுபாஷினி என்ற பெண்ணைக் காதலித்து வந்துள்ளார். இருவரும் வெவ்வேறு சமூகங்களைச் சேர்ந்தவர்கள் என்பதால் காதலுக்கு எதிர்ப்பு கிளம்பிய நிலையில், கடந்த 2025 ஜூலை 27ஆம் தேதி திருநெல்வேலி பாளையங்கோட்டை கே.டி.சி நகரில் கவின் வெட்டிக் கொலை செய்யப்பட்டார். இந்தக் கொலை தொடர்பாக சுபாஷினியின் சகோதரர் சுர்ஜித் கைது செய்யப்பட்டார். இதனை தொடர்ந்து நடைபெற்ற விசாரணையில், சுர்ஜித்தின் பெற்றோரும் காவல்துறை உதவி ஆய்வாளர்களுமான சரவணன், கிருஷ்ணகுமாரி மற்றும் உறவினர் ஜெயபால் ஆகியோரும் வழக்கில் சேர்க்கப்பட்டனர். இந்த வழக்கில் தங்களுக்கு எதிராக போதிய ஆதாரங்கள் இல்லை எனக்கூறி சரவணன் மற்றும் கிருஷ்ணகுமாரி ஆகியோர் சென்னை உயர்நீதிமன்ற மதுரைக் கிளையில் வழக்கு தொடர்ந்தனர், இந்த மனுக்களை விசாரித்த நீதிமன்றம், இருவருக்கும் எதிரான குற்றப்பத்திரிகையை ரத்து செய்து உத்தரவிட்டது. இந்த உத்தரவை எதிர்த்து தமிழக அரசு கடந்த அக்டோபர் 16ஆம் தேதி உச்சநீதிமன்றத்தில் மேல்முறையீடு செய்தது. இந்த மேல்முறையீட்டு மனு உச்சநீதிமன்றத்தில் நீதிபதிகள் பிரசாந்த் குமார் மிஸ்ரா மற்றும் ஸ்ரீசந்திரசேகர் ஆகியோர் அடங்கிய அமர்வில் விசாரணைக்கு வந்தபோது, ஒரு குற்றவியல் வழக்கு எவ்வாறு கையாளப்படக் கூடாதோ அவ்வாறு இந்த வழக்கு கையாளப்பட்டுள்ளதாகக் குறிப்பிட்ட நீதிபதிகள், தமிழக அரசு தாக்கல் செய்த மேல்முறையீட்டு மனுவைத் தள்ளுபடி செய்து உத்தரவிட்டனர்.
கவின் ஆணவக் கொலை வழக்கு: பெண்ணின் பெற்றோருக்கு எதிரான தமிழக அரசின் மேல்முறையீட்டு மனு தள்ளுபடி
