பட மூலாதாரம், ANI டெல்லியின் ராம்லீலா மைதானத்தில் இந்தியா கூட்டணி சார்பில் பொதுக்கூட்டம் நடைபெறுகிறது. தலைமைத் தேர்தல் ஆணையர் பதவி விலக வேண்டும் என்றும், தேர்தல் சீர்திருத்தங்கள் மேற்கொள்ளப்பட வேண்டும் என்றும் வலியுறுத்தி இந்த கூட்டம் நடைபெறுகிறது. பொதுக்கூட்டத்துக்கு ஆதரவு தெரிவிப்பதற்காக, நாட்டின் பல்வேறு பகுதிகளில் இருந்தும் எதிர்க்கட்சிகளின் ஆதரவாளர்கள் திரண்டுள்ளனர். முன்னதாக, காங்கிரஸ் தலைவர் மல்லிகார்ஜுன கார்கேவின் இல்லத்தில் இருந்து எதிர்க்கட்சித் தலைவர்கள் பேரணியாக சென்றனர். இந்த நாட்டில் பல ஆண்டுகளாக வாக்குகள் திருடப்பட்டு வருவதாக காங்கிரஸ் எம்.பி. ராகுல் காந்தி குற்றம் சாட்டினார். "மேற்கு வங்கம், மத்தியப் பிரதேசம், ஹரியாணா, சத்தீஸ்கர், மகாராஷ்டிரா, கர்நாடகா ஆகிய மாநிலங்களில் நடைபெற்ற தேர்தல்கள் மற்றும் 2024 மக்களவைத் தேர்தல் என அனைத்திலும் வாக்குகள் திருடப்பட்டுள்ளன. மின்னணு வாக்குப்பதிவு இயந்திரங்கள் மூலமாகவும், வாக்காளர் பட்டியலில் இருந்து பெயர்களை நீக்கியும், பலருடைய பெயர்களைப் பட்டியலில் சேர்த்தும் வாக்குகள் திருடப்பட்டுள்ளன" என்றும் அவர் தெரிவித்தார். 2024 மக்களவைத் தேர்தலுக்குப் பிறகு, வாக்காளர் பட்டியலிலிருந்து 13 கோடிக்கும் அதிகமான வாக்காளர்கள் நீக்கப்பட்டதாக ராகுல் காந்தி கூறினார். தொடர்ந்து அவர், "நாட்டை மீண்டும் சரியான பாதையில் கொண்டுவருவதற்கான முதல் படி, ஞானேஷ் குமாரை நீக்குவதே ஆகும். நரேந்திர மோதி எங்கும் செல்லப்போவதில்லை என்று அமித் ஷா கூறுகிறார். ஆனால், நீங்களும் நரேந்திர மோதியும் எங்கும் செல்ல அனுமதிக்கப்பட மாட்டீர்கள் என்று நான் சொல்ல விரும்புகிறேன். ஞானேஷ் குமாருக்குப் பிறகு, நாங்கள் உங்கள் முன் நிற்போம். உங்கள் மீது சட்ட நடவடிக்கை எடுக்கப்படும்." வாக்குகள் திருடப்பட்டதாகக் குற்றம் சாட்டிய ராகுல் காந்தி, "இது சாதாரணத் திருட்டு அல்ல. ஒரு கடையில் யாராவது ஒரு பொருளைத் திருடுவதுதான் சாதாரணத் திருட்டு. இது ஒவ்வொரு மனிதனின் குரலையும் திருடும் செயலாகும். இதற்குத் துரோகம் என்று பெயர். ஞானேஷ் குமார் இல்லையென்றால், நரேந்திர மோதி பிரதமராகியிருக்க முடியாது, அமித் ஷா உள்துறை அமைச்சராகியிருக்க முடியாது" என்று கூறினார். பட மூலாதாரம், ANI இதற்கிடையில், மேற்கு வங்க முன்னாள் முதலமைச்சர் மமதா பானர்ஜி கூறுகையில், "மேற்கு வங்கம் எஸ்.ஐ.ஆரால் உருவான ஒரு சூழலின் பலியாடாக மாறியுள்ளது. நாங்கள் இதை அப்படியே விட்டுவிட மாட்டோம்; போராடுவோம். அவர்கள் மேற்கு வங்கத்தைச் சூறையாடிவிட்டனர். டெல்லியிலிருந்து ஜனநாயகத்தைக் காப்பாற்றுவோம். ஜனநாயகத்தை மீண்டும் கொண்டு வருவோம்." என்று தெரிவித்தார். தேர்தலுக்கு முன்னதாக மேற்கு வங்கத்தில் ஒரு கோடிக்கும் அதிகமான வாக்குகள் நீக்கப்பட்டதாகக் குற்றம் சாட்டிய மமதா பானர்ஜி, தான் தேர்தலில் தோற்கவில்லை என்றும், மாறாகத் தோற்கடிக்கப்பட்டேன் என்றும் கூறினார். End of அதிகம் படிக்கப்பட்டது பட மூலாதாரம், ANI பிபிசி தமிழ் செய்திகளை செல்போனிலேயே படிக்கலாம் பின்தொடர கிளிக் செய்யவும் வாட்ஸ்அப் விளம்பரம் - முடிவு பொதுக்கூட்டத்தில் உரையாற்றிய காங்கிரஸ் தலைவர் மல்லிகார்ஜுன கார்கே, "பிரதமர் மோதியும், உள்துறை அமைச்சர் ஷாவும் இளைஞர்கள், பெண்கள் மற்றும் தலித்துகளின் வாக்குகளைப் பறிக்க முயன்றுள்ளனர். அதற்கு எதிராகவே நாம் இங்கே கூடியுள்ளோம்" என்று கூறினார். மேலும் அவர் கூறுகையில், "பிரதமர் மோதி தனது சீடரை இங்கே நிறுத்தி, அனைவரது வாக்குகளையும் பிரிக்க முயற்சி செய்கிறார். அந்த ஞானேஷ் குமாரை நீக்குவதற்காகவே நாங்கள் இங்கு வந்துள்ளோம். அவரை நீக்கும் வரை நாங்கள் ஓயமாட்டோம்." என்று தெரிவித்தார். ஞானேஷ் குமார் தலைமறைவானாலும், நாங்கள் அவரைத் தேடிப் பிடித்து வெளியே கொண்டு வருவோம் என்று தனது உரையில் குறிப்பிட்ட கார்கே, "பிரதமர் மோதி அவர்களே, சிபிஐ மற்றும் அமலாக்கத் துறையை பயன்படுத்தி எங்களை அச்சுறுத்தப் பார்க்கிறீர்கள். இத்தகைய அமைப்புகளைக் கொண்டு நீங்கள் மேற்கொள்ளும் மிரட்டல்களுக்கு நாங்கள் அஞ்சப்போவதில்லை." என்றார். பிரதமர் மோதி மக்களைப் பிரித்தாளுவதாகக் குற்றம் சாட்டிய கார்கே, "அவர் வாக்குகளைத் தேர்ந்தெடுத்துப் பெற முயல்கிறார். அவர் மக்களால் தேர்ந்தெடுக்கப்பட்ட பிரதமர் அல்ல" என்று கூறினார். பாஜக அரசாங்கத்தை 'திருட்டுத்தனமான அரசாங்கம்' என்று குறிப்பிட்ட அவர், "பிகாரோ அல்லது உத்தரப் பிரதேசமோ, இவை அனைத்தும் திருட்டுத்தனமாக அமைக்கப்பட்ட அரசாங்கங்களே. மோதியை அகற்றினால் மட்டுமே ஜனநாயகத்தைக் காப்பாற்ற முடியும். நாம் அனைவரும் இணைந்து போராடி, அரசியலமைப்பைக் காப்போம் என்று கேட்டுக்கொள்கிறேன்." என்று கூறினார். பட மூலாதாரம், ANI சமாஜ்வாதி கட்சியின் தலைவர் அகிலேஷ் யாதவ் கூட்டத்தில் பேசுகையில், "நாங்கள் அவர்களுக்கு எதிராக ஒன்றிணைந்த பிறகு, அவர்களும் பழைய விஷயங்களை நினைவுகூர்ந்து எங்களுடன் இணைய விரும்புகிறார்கள் என்று கேள்விப்பட்டேன். நான் தேர்ந்தெடுக்கப்பட்ட தொகுதியைச் சேர்ந்த எனது சக ஊழியர்களுக்குத் தெரியும். அதே வேளையில், உத்தரப் பிரதேசத்தில் பாரதிய ஜனதா கட்சி, 12.7 மில்லியன் வாக்குகள் ரத்து செய்யப்பட்டுள்ளதாகக் கூறியது" என்று தெரிவித்தார். மேலும் அவர், "இப்போது பாஜகவினருக்கே தங்கள் வாக்குகள் நீக்கப்பட்டிருப்பது நினைவுக்கு வருகிறது. காசி மக்கள் அவர்களுக்கு 'டபுள் ஜீரோ' (இரட்டை பூஜ்ஜியம்) வழங்கியதில் நான் மகிழ்ச்சியடைகிறேன். சண்டிகரில் செய்தது போல, வாக்கு எண்ணிக்கையை இரண்டு இரவுகள் மற்றும் மூன்று நாட்களுக்கு நீட்டித்து தந்திரம் செய்ய அவர்கள் முயன்றனர், ஆனால் அதில் அவர்கள் வெற்றி பெறவில்லை. உத்தரப் பிரதேசத்தில் 'டபுள் என்ஜின்' (இரட்டை என்ஜின்) என்று சொல்லிக்கொள்பவர்களுக்கு இரட்டைத் தோல்வியும், 'டபுள் ஜீரோ'வும் கிடைத்துள்ளது. அந்தப் பகுதிதான் கியோட்டோ என்றும் அழைக்கப்படும் காசி." வங்காளத்திற்கு முன்பே, உத்தரப் பிரதேசத்தின் ராம்பூரில் பலத்தைப் பயன்படுத்தி வாக்குகள் திருடப்பட்டதாகக் குற்றம் சாட்டும் அவர், "அவர்கள் வீடுகளுக்குச் சென்று, மக்கள் வெளியே வந்தால் சிறையில் அடைக்கப்படுவார்கள் என்று மிரட்டினர். ஒரு பெண் வாக்களிப்பதைத் தடுத்த காவல்துறை அதிகாரியின் அந்தச் காட்சிகள் மறக்க முடியாதவை" என்று தெரிவித்தார். தலைவர் தேர்தல் ஆணையர் மீது குற்றம் சாட்டிய அகிலேஷ் யாதவ், "அவர்தான் மிக முக்கியமான கண்ணி. ஒரு பெரிய நிறுவனமும் அவருடன் இணைந்து செயல்படுகிறது. அவர் வாக்குகளை அபகரிப்பவர் என்று கேள்விப்பட்டிருந்தோம், இப்போது அவரது முடிவு நெருங்கிவிட்டது. இளைஞர்களுக்கு இழைக்கப்பட்ட ஒவ்வொரு தாக்குதலுக்கும், ஒவ்வொரு காயத்திற்கும் நாங்கள் பதிலடி கொடுப்போம்" என்று கூறினார். பட மூலாதாரம், X/@RahulGandhi காங்கிரஸ் தலைமையிலான இந்தியா கூட்டணியில் இடம்பெற்றுள்ள முக்கியக் கட்சிகளின் தலைவர்கள் பலரும் இந்தப் பொதுக்கூட்டத்தில் பங்கேற்பதாக அறிவித்துள்ளனர். காக்ரோச் ஜனதா கட்சியும் பொதுக்கூட்டத்துக்கு ஆதரவு தெரிவித்துள்ளது. இந்தப் பொதுக்கூட்டத்தில் பங்கேற்பதற்காக 10 லட்சம் பேர் டெல்லிக்கு வருவார்கள் என்று மார்க்சிஸ்ட் கம்யூனிஸ்ட் கட்சியின் மாநிலங்களவை உறுப்பினர் ஜான் பிரிட்டாஸ் தெரிவித்துள்ளார். பட மூலாதாரம், ANI இதற்கிடையே, பொதுக்கூட்டம் நடைபெறும் இடத்தில் பாதுகாப்புப் படையினர் குவிக்கப்பட்டுள்ளதையும், அதற்கான ஏற்பாடுகள் நடைபெறுவதையும் காட்டும் படங்கள் வெளியாகியுள்ளன. இந்தப் பொதுக்கூட்டம் பெரிய மாற்றத்துக்கான அறிகுறி என்று இந்தியா கூட்டணி கூறுகிறது. ஆனால், "கட்சிகள் தனித்தனியாகத் தேர்தலில் போட்டியிடும்போது, இந்தியா கூட்டணி எங்கே இருக்கிறது?" என்று பாஜக கேள்வி எழுப்பியுள்ளது. ராம்லீலா மைதானத்தை நோக்கிப் பெருமளவில் மக்கள் வருவார்கள் என்று எதிர்பார்க்கப்படும் நிலையில், போக்குவரத்து பாதிக்கப்படக்கூடும் என டெல்லி போக்குவரத்துக் காவல்துறை வெளியிட்டுள்ள அறிவிப்பில் தெரிவிக்கப்பட்டுள்ளது. செய்தி முகமை பிடிஐ தகவலின்படி, மேற்கு டெல்லியின் பல பகுதிகளில் போக்குவரத்துக்குக் கட்டுப்பாடுகள் விதிக்கப்பட்டுள்ளன அல்லது வாகனங்கள் மாற்றுப் பாதைகளில் திருப்பிவிடப்பட்டுள்ளன. ராகுல் காந்தியின் பேரணியை முன்னிட்டு, மிண்டோ சாலையில் ஏராளமான காவல்துறையினர் பாதுகாப்புப் பணியில் ஈடுபடுத்தப்பட்டுள்ளதாக பிபிசி செய்தியாளர் ஷாத் மிதாத் தெரிவித்துள்ளார். காங்கிரஸ் தொண்டர்களும் அங்கு திரண்டு வருகின்றனர். - இது, பிபிசிக்காக கலெக்டிவ் நியூஸ்ரூம் வெளியீடு குறுங்காணொளிகள் முடிவு
'நான் தேர்தலில் தோற்கவில்லை, தோற்கடிக்கப்பட்டேன்' - இந்தியா கூட்டணி பொதுக்கூட்டத்தில் தலைவர்கள் பேசியது என்ன?
