மாட்ரிட்: ஸ்பெயினில் இரண்டு அதிவேக பயணிகள் ரயில்கள் ஒன்றோடொன்று மோதி ஏற்பட்ட பயங்கர விபத்தில் 68 பேர் உயிரிழந்துள்ளனர். 179-க்கும் மேற்பட்டோர் மருத்துவமனையில் அனுமதிக்கப்பட்டுள்ளனர். அதில் ஒரு சிலரின் நிலைமை கவலைக்கிடமாக உள்ளதால் உயிரிழப்பு எண்ணிக்கை மேலும் அதிகரிக்கும் என்று அஞ்சப்படுகிறது. ஸ்பெயினின் மத்திய பகுதியில் உள்ள டொலிடோ மாகாணத்தில் உள்ள உர்டா மற்றும் லாஸ் யெபனஸ் பகுதிகளுக்கு இடையே ரென்ஃபே மற்றும் இரியோ ஆகிய இரு வேறு தனியார் மற்றும் அரசு நிறுவனங்களால் இயக்கப்படும் அதிவேக ரயில்கள் ஒரே பாதையில் ஒரே திசையில் பயணித்தன. அப்போது, பின்னால் வந்த ரென்ஃபே ரயில், முன்னால் சிக்னலில் நின்றிருந்த இரியோ ரயிலின் பின்பகுதியில் அதிவேகமாக மோதியது. இதில், இரண்டு பெட்டிகள் தடம் புரண்டு பள்ளத்தில் சரிந்தன. சிக்னல் அமைப்பில் ஏற்பட்ட கோளாறைச் சரி செய்யும் பணியில் ஈடுபட்டிருந்த ஊழியர் ஒருவர் எச்சரிக்கை செய்யத் தவறியதால் ஏற்பட்ட மனிதத் தவறே இந்த விபத்துக்குக் காரணம் என முதற்கட்ட தகவல்கள் தெரிவிக்கின்றன. இச்சம்பவத்தின் போது ரென்ஃபே ரயிலில் 397 பயணிகளும், இரியோ ரயிலில் 147 பயணிகளும் இருந்தனர். இந்த விபத்தில் இதுவரை 68-க்கும் மேற்பட்டோர் உயிரிழந்துள்ளனர், 179-க்கும் மேற்பட்டோர் காயமடைந்துள்ளனர். மருத்துவமனையில் பலர் கவலைக்கிடமான நிலையில் உள்ளனர். இந்த விபத்தைத் தொடர்ந்து நகரங்களுக்கு இடையேயான அதிவேக ரயில் சேவை நிறுத்தி வைக்கப்பட்டுள்ளது. பிரதமர் இரங்கல் ஸ்பெயின் பிரதமர் பெட்ரோ சான்செஸ், “டொலிடோ மாகாணத்தில் நடந்த ரயில் விபத்து அதிர்ச்சியளிக்கிறது. இந்த விபத்தில் சிக்கி உயிரிழந்தவர்களின் குடும்பத்தினருக்கு எனது ஆழ்ந்த அனுதாபங்களைத் தெரிவித்துக் கொள்கிறேன்” என்று தெரிவித்துள்ளார்.
ஸ்பெயினில் 2 அதிவேக ரயில்கள் மோதிய விபத்தில் 68 பேர் உயிரிழப்பு
📅
📍 Tamil Nadu, Tamil Nadu
🏷️ News
✍️ TN24 Editorial Desk
🔗 Source: hindutamil.in (original report) ↗
