சேலம்: பத்திரப்பதிவுத் துறையில் ‘ஸ்டார் 3.0’ திட்டத்தின் கீழ் இணையவழி பத்திரப் பதிவு நடைமுறைக்கு வந்துள்ள நிலையில், தமிழகத்தின் பல்வேறு பகுதிகளில் புதிய வீட்டுமனைகளுக்கான சர்வே எண்கள் இணைய தளத்தில் விடுபட்டுள்ளதால், பத்திரப்பதிவு செய்ய முடியாமல் பொதுமக்கள் அவதிப்பட்டு வருகின்றனர். தமிழகத்தில் பத்திரப்பதிவுத் துறையை நவீனப்படுத்தும் வகையில், ‘ஸ்டார் 2.0’ திட்டம் 2018-ம் ஆண்டு பிப்ரவரியில் நடைமுறைப்படுத்தப்பட்டது. தொடர்ந்து, ‘ஸ்டார் 3.0’ திட்டமாக நவீனப்படுத்தப்பட்டு, கடந்த ஆகஸ்ட் 17-ம் தேதி முழுமையாக பயன்பாட்டுக்கு வந்தது. இதன்மூலம், புதிய அடுக்குமாடிக் குடியிருப்புகள், அங்கீகரிக்கப்பட்ட மனைப்பிரிவுகளின் முதல்முறை விற்பனைப் பத்திரங்கள், வங்கிக் கடன் பெறுவதற்கான ஆவணங்கள் உள்ளிட்டவற்றைச் சார்-பதிவாளர் அலுவலகத்துக்கு நேரில் செல்லாமல் இணையவழியில் மட்டுமே பதிவு செய்யும் நேரடி வருகையில்லா ஆவணப்பதிவு முறை அமல்படுத்தப்பட்டது. இந்நிலையில், ‘ஸ்டார் 3.0’ திட்டம் நடைமுறைக்கு வந்த ஆகஸ்ட் 17-ம் தேதிக்குப் பிறகு, தமிழகத்தின் பல்வேறு பகுதிகளில் புதிய வீட்டுமனைகளுக்கான சர்வே எண்கள் பதிவுத்துறையின் tnreginet இணையதளத்தில் இடம்பெறவில்லை எனப் புகார் எழுந்துள்ளது. இதனால், வீட்டுமனைகளை வாங்கியவர்கள் அவற்றைப் பத்திரப்பதிவு செய்ய முடியாத நிலை ஏற்பட்டுள்ளது. இதற்கு உதாரணமாக, சேலம் மாவட்டம், தலைவாசல் வட்டம், மணிவிழுந்தான் தெற்கு கிராமத்தில் மட்டும் 450-க்கும் மேற்பட்ட சர்வே எண்கள் விடுபட்டுள்ளன. இதனால், அப்பகுதியில் வீட்டுமனைகளை விற்பனை செய்பவர்களும், வாங்கியவர்களும் கடந்த 2 மாதங்களாக அவற்றைப் பதிவு செய்ய முடியாமல் தவித்து வருகின்றனர். இதுகுறித்து வீட்டுமனை விற்பனையில் ஈடுபட்டுள்ளோர் மற்றும் மனைகளை வாங்கியோர் கூறியதாவது: பதிவுத்துறையின் tnreginet இணையதளத்தில் புதிய வீட்டுமனைகளுக்கான சர்வே எண்கள் விடுபட்டுள்ளதால், கடந்த 2 மாதங்களாக வீட்டுமனை விற்பனை பெரிதும் பாதிக்கப்பட்டுள்ளது. வீட்டுமனைகளை வாங்குவதற்காக வங்கிக் கடன் பெற விண்ணப்பிக்க முடியாத நிலையும் ஏற்பட்டுள்ளது. பல மாவட்டங்களிலும் வீட்டுமனை விற்பனை பாதிக்கப்பட்டுள்ளதால், பத்திரப்பதிவுத் துறைக்கும் அதன் மூலம் கிடைக்க வேண்டிய வருவாயும் பாதிக்கப்பட்டுள்ளது, என்றனர். இதுகுறித்து பத்திரப்பதிவுத் துறை உயரதிகாரிகளிடம் கேட்டபோது, ‘ஸ்டார் 3.0 திட்டத்தில் மென்பொருள் நிறுவனம், வருவாய்த் துறை ஆவணங்களை மேப்பிங் செய்தபோது சில சர்வே எண்கள் விடுபட்டதால் இந்தப் பிரச்சினை ஏற்பட்டுள்ளது. தமிழகத்தின் பல்வேறு பகுதிகளிலும் இதுபோன்ற பிரச்சினை எழுந்துள்ளது. இதுகுறித்து சம்பந்தப்பட்ட மென்பொருள் நிறுவனத்தின் கவனத்துக்குக் கொண்டு செல்லப்பட்டுள்ளது. விரைவில் இப்பிரச்சினைக்குத் தீர்வு காணப்படும்’ என்றனர்.
‘ஸ்டார் 3.0’ திட்டத்தில் புதிய சர்வே எண்கள் விடுபட்டதால் சிக்கல்: புதிய வீட்டுமனைகளை பத்திரப்பதிவு செய்ய முடியாமல் அவதி
