ஆண்டிபட்டி: தேனி சிறையில் மோசமான உணவு, சித்திரவதை, உறவினர்களைப் பார்க்க அனுமதிக்காதது போன்ற காரணங்களால்தான் அங்கிருந்து தப்பிச் சென்றோம் என்று கைதி ஒருவர் தப்பியபோது வெளியிட்ட வீடியோ வைரலாகிறது. 17 பேர் தப்பிய நிலையில், அந்த வீடியோவில் 21 பேர் தப்பிச் சென்றதாக கூறியதும் பரபரப்பை ஏற்படுத்தி உள்ளது. தேனி மாவட்ட சிறையில் இருந்து அக். 26-ம் தேதி இரவு 17 கைதிகள் போலீஸாரை தாக்கிவிட்டு தப்பினர். பின்னர் போலீஸார் பல தனிப்படைகளை அமைத்து அவர்களை பிடித்தனர். தப்பிச் சென்றபோது மீனாட்சிசுந்தரம் என்ற கைதி வனப்பகுதியில் இருந்து வீடியோ ஒன்றைப் பதிவு செய்துள்ளார். இந்த வீடியோ தற்போது சமூக வலைதளங்களில் வைரலாகி வருகிறது. வீடியோவில் அவர் கூறியதாவது: சிறையில் நாங்கள் யாருக்கும் எந்தப் பிரச்சினையும் செய்யவில்லை. நீதிபதிக்கும், முதல்வருக்கும் பணிவாக நாங்கள் கேட்டு கொள்கிறோம். சிறையில் இருந்து நாங்கள் 21 பேரும் தப்பியது, இங்கு உணவு மோசமாக இருந்ததும், எங்களை சித்திரவதை செய்ததும்தான் காரணம். தப்பிய இடத்தில் இப்படி ஆகி விட்டது. எந்த நீதிபதி, எங்கள் உயிரரை காப்பாற்றுகிறோரோ அவரிடம் அனைத்து உண்மையையும் சொல்லத் தயாராக இருக்கிறோம். சிறையில் நடக்கும் பிரச்சினைகளை கண்காணிப்பாளரிடம் சொன்னபோதும், “எங்களைப் பற்றியே புகார் செய்யும் அளவுக்கு அவ்வளவு பெரிய ஆளா நீங்கள்” என்று கூறி மீண்டும் எங்களைத் தாக்கி மோசமாக நடத்தினார்கள். எங்கள் உறவினர்கள் பலமுறை மனு போட்டும் எங்களை சந்திக்கவிடவில்லை. அதனால் பயந்துபோய்த்தான் தப்பித்து வந்தோம். நீதிபதியிடம் இதெல்லாம் சொல்லி சரணடைந்து கொள்கிறோம். மற்றபடி நாங்கள் போலீஸாருக்கோ, பொதுமக்களுக்கோ எந்த இடையூறும் செய்ய தப்பவில்லை. தற்போது எங்களை சுட்டுப் பிடிக்க உள்ளதாக தகவல் வந்துள்ளது. எனக்கு இப்போதுதான் திருமணம் முடிந்து, எனது மனைவி கர்ப்பமாக இருக்கிறார். நான் திருந்தி வாழ ஆசைப்படுகிறேன். நாங்கள் எந்தத் தப்பும் செய்யவில்லை. தப்பிச்சென்ற திட்டத்தில் நாங்கள்தான் முக்கிய குற்றவாளிகள் என்கிறார்கள். எங்களுக்கு நீதி வேண்டும். சிறைக் கண்காணிப்பாளரிடம் நாங்கள் பலமுறை அனுமதி கேட்டு எங்கள் பிரச்சினைகளைக் கூறினோம். நீதிபதிகள்தான் எங்களுக்கு உதவ வேண்டும். எனது குழந்தை, மனைவி வாழ்க்கை போய் விடும். தெரியாமல் இந்த தப்பைச் செய்துவிட்டோம். எங்கள் மீதே அனைத்துப் பழியையும் போடுகின்றனர். இவ்வாறு அந்த வீடியோவில் தெரிவித்துள்ளார். சிறையில் இருந்து 17 பேர் தப்பிச் சென்றதாக சிறை மற்றும் போலீஸ் நிர்வாகம் தெரிவித்த நிலையில் வீடியோவில் 21 பேர் தப்பி்ச் சென்றதாக கைதி கூறியுள்ளது சர்ச்சையை ஏற்படுத்தி உள்ளது. மேலும் தப்பிச் சென்றபோது அவர்களிடம் மொபைல் இருந்துள்ளதும் சர்ச்சையை ஏற்படுத்தி உள்ளது. இதன்மூலம் சிறையில் கைதிகளிடையே மொபைல் பயன்பாடு இருந்துள்ளது தெரிய வந்துள்ளது.
தேனி சிறையில் தப்பியது 17 பேரா? 21 பேரா? - கைதி வெளியிட்ட வீடியோவால் சர்ச்சை
📅
📍 Tamil Nadu, Tamil Nadu
🏷️ News
✍️ TN24 Editorial Desk
🔗 Source: hindutamil.in (original report) ↗
