ஆஸ்திரேலியாவிலிருந்து அமெரிக்காவிற்குப் பழுதுபார்ப்பதற்காக அனுப்பப்பட்ட F-35 ஸ்டெல்த் போர் விமானத்தின் சில பாகங்கள், பயணத்தின்போது வழிமாறி சீனாவின் ஹாங்காங்கைச் சென்றடைந்துள்ளன. இதுதொடர்பாக அமெரிக்கப் பெண்டகன் மற்றும் ஆஸ்திரேலியப் பாதுகாப்பு அமைச்சகம் விசாரணைகளை மேற்கொண்டு வருகின்றன. ஆஸ்திரேலியாவில் உள்ள வில்லியம் டவுன் மையத்திலிருந்து அமெரிக்காவிற்குப் பழுதுபார்ப்பதற்காக F-35 விமானத்தின் பழுதடைந்த பாகங்கள் கொண்டு செல்லப்பட்டன. அந்தப் பாகங்களில் விமானியின் அறைக்கான மேற்கூரையும், ஆயுதக் கிடங்குக் கதவும் அடங்கும். இவை இரண்டும், விமானத்தின் மறைந்திருந்து தாக்கும் திறனை மேம்படுத்தும் ரேடாரை உறிஞ்சும் பொருளால் பூசப்பட்டிருந்தன. இந்தத் திறனை முழுமையாக உருவாக்க, அமெரிக்காவிற்குப் பல ஆண்டுகள் பிடித்தன. இந்தச் சூழலில்தான், அந்தப் பாகங்கள் இடைத்தரகு போக்குவரத்து நிறுவனத்தின் குளறுபடியால் ஹாங்காங்கிற்குத் திருப்பிவிடப்பட்டன. ஆஸ்திரேலியப் பாதுகாப்பு அமைச்சர் ரிச்சர்ட் மார்லெஸ் இந்த விவகாரத்தை உறுதிப்படுத்தியுள்ளார். இருப்பினும், இவை மிகவும் ரகசியமான உணர்திறன்மிக்க பாகங்கள் அல்ல என்று அவர் தெரிவித்துள்ளார். அதேபோல், F-35 கூட்டுத் திட்ட அலுவலகமும் (JPO) இச்சம்பவத்தை உறுதிசெய்து, விநியோகச் சங்கிலி குறைபாடுகளை ஆராயவும், பாகங்களை மீட்கவும் நடவடிக்கை எடுத்து வருகிறது. மேலும், இச்சம்பவம் வணிகரீதியான போக்குவரத்துத் தவறு காரணமாக நடந்ததா அல்லது இதில் பிற தலையீடுகள் உள்ளதா என்பது குறித்து அமெரிக்கா மற்றும் ஆஸ்திரேலியாவின் உளவு அமைப்புகள் தொடர்ந்து விசாரணை நடத்தி வருகின்றன. ஆனால், அத்தகைய சம்பவம் எதுவும் தங்களுக்குத் தெரியாது என்று சீனா தெரிவித்துள்ளது. எனினும், சமீபத்திய ஆண்டுகளில், சீனா கடுமையான தேசியப் பாதுகாப்புச் சட்டங்கள் மூலம் ஹாங்காங்கின் மீதான தனது பிடியை வலுப்படுத்தியிருப்பது கவனிக்கத்தக்கது. அதேநேரத்தில், விமானத்தின் ரேடாரில் சிக்காமல் தவிர்க்க உதவும் சிறப்புத் தொழில்நுட்பப் பூச்சு அதில் இருப்பதால், சீனா இதை ஆய்வு செய்து 'ரிவர்ஸ் இன்ஜினியரிங்' செய்யக்கூடும் என அமெரிக்கா கவலை தெரிவித்துள்ளது. F-35 விமானம் அமெரிக்க வான் சக்தியின் மையப்புள்ளியாகும், இவ்விமானத்தின் தொழில்நுட்பங்களை அமெரிக்கா பல ஆண்டுகளாக மிகவும் ரகசியமாகப் பாதுகாத்து வருகிறது. இதனால்தான் அமெரிக்கா தனது நேட்டோ நட்பு நாடுகளைத் தவிர மற்ற நாடுகளுக்கு இந்த விமானத்தை விற்கத் தயக்கம் காட்டி வந்தது. இருப்பினும், அதிபர் டொனால்டு ட்ரம்ப், கடந்த வாரம் சவூதி அரேபியாவுக்கு 48 F-35 விமானங்களை விற்பனை செய்ய ஒப்புதல் அளித்துள்ளார். தற்போது, F-35 விமானத்தின் பாகங்களை சீனா தலைகீழாகப் பொறியியல் செய்து, அதன்மூலம் J-20 மற்றும் J-35 போன்ற தனது சொந்த மறைமுகத் தாக்குதல் விமானங்களை மேம்படுத்தக்கூடும் என்பதே அமெரிக்காவின் மிகப்பெரிய கவலையாக உள்ளது.
சீனாவிடம் சிக்கிய F-35 விமானத்தின் பாகங்கள்.. ஆபத்தில் ரகசிய தொழில்நுட்பம்.. அச்சத்தில் அமெரிக்கா!
📅
📍 Tamil Nadu, Tamil Nadu
🏷️ News
✍️ TN24 Editorial Desk
