புதுடெல்லி: இண்டியா கூட்டணி நடத்திய பேரணி மற்றும் பொதுக்கூட்டத்தால் டெல்லி வர்த்தகர்களுக்கு ரூ.10 ஆயிரம் கோடி இழப்பு ஏற்பட்டதாக சிடிஐ அமைப்பின் தலைவர் தெரிவித்துள்ளார். தலைமைத் தேர்தல் ஆணையர் பதவி விலக வலியுறுத்தி டெல்லி ராம் லீலா மைதானத்தில் நவம்பர் 1-ம் தேதி பேரணி, பொதுக்கூட்டம் நடைபெறும் என இண்டியா கூட்டணி அறிவித்தது. தீபாவளி பண்டிகை வர்த்தகம் பாதிக்கப்படும் என்பதால் பேரணியை தள்ளி வைக்க வேண்டும் என்று வர்த்தகர் சங்கங்கள் கோரிக்கை விடுத்தன. இதை நிராகரித்த இண்டியா கூட்டணி, நேற்று முன்தினம் திட்டமிட்டபடி பேரணி மற்றும் பொதுக்கூட்டத்தை நடத்தியது. இதுகுறித்து வணிக மற்றும் தொழில் சம்மேளன (சிடிஐ) தலைவர் பிரிஜேஷ் கோயல் கூறியதாவது: டெல்லி ராம் லீலா மைதானத்தைச் சுற்றி முக்கியமான சுமார் 20 முதல் 25 சந்தைகள் இயங்கி வருகின்றன. இப்பகுதியில் சுமார் 3 லட்சம் கடைகள் உள்ளன. தீபாவளி வர்த்தகம் சூடுபிடித்துள்ள நிலையில் பேரணி நடைபெற்றதால் வர்த்தகம் கடுமையாக பாதிக்கப்பட்டது. அகில இந்திய வர்த்தகர்கள் கூட்டமைப்பின் (சிஏஐடி) கீழ் பல்வேறு சந்தைகளைச் சேர்ந்த வர்த்தகர்களை உள்ளடக்கிய வாட்ஸ்அப் குழுக்களிடமிருந்து பெற்ற தரவுகளின் அடிப்படையில் சுமார் 80% கடைகள் மூடப்பட்டிருந்தன. கடைகள் திறக்கப்பட்டிருந்த இடங்களிலும் கூட விற்பனை என்பது பெயரளவில்கூட இல்லை. சரக்குகளை ஏற்றி இறக்கும் பணிகள் முற்றிலுமாக முடங்கின. டெல்லியைச் சுற்றியுள்ள நகரங்களிலிருந்து வாடிக்கையாளர்கள், விநியோகஸ்தர்கள் என சுமார் 4 லட்சம் பேர் வருவார்கள். ஆனால் இந்தப் பேரணி காரணமாக அவர்கள் வரவில்லை. மேலும் சுமார் 5 ஆயிரம் வாகனங்கள் பழைய டெல்லி மற்றும் மத்திய டெல்லி சந்தைகளுக்கு பொருட்களை கொண்டுசெல்ல முடியவில்லை. இதன் காரணமாக மொத்தத்தில் வர்த்தகர்களுக்கு சுமார் ரூ.10,000 கோடி வரை இழப்பு ஏற்பட்டுள்ளது. இந்த வணிக முடக்கத்துக்கு யார் இழப்பீடு வழங்குவார்கள். இவ்வாறு அவர் தெரிவித்தார். காஷ்மீர் கேட் பகுதியைத் தலைமையிடமாகக் கொண்ட வாகன உதிரிபாகங்கள் வர்த்தகர் சங்கத் (ஏபிஎம்ஏ) தலைவர் வினய் நரங் கூறும்போது, “நாங்கள் எந்தவொரு அரசியல் கட்சியுடனும் இணைந்தவர்கள் அல்ல, ஜனநாயகப் போராட்டங்களுக்கு எதிரானவர்களும் அல்ல. ஆனால் நேரமும் இடமும் முற்றிலும் தவறானவை. ஆசியாவின் மிகப்பெரிய வணிகப் பகுதியின் நடுப்பகுதியில் ராம் லீலா மைதானம் அமைந்துள்ளது. சாந்தினி சவுக், சடார் பசார், தர்யா கஞ்ச், மோரி கேட் மற்றும் காஷ்மீர் கேட் போன்ற முக்கியச் சந்தைகள் மூன்று கிலோமீட்டர் சுற்றளவில் உள்ளன. இந்நிலையில் இங்கு போராட்டம் நடப்பதால் வர்த்தகம் கடுமையாக பாதிக்கப்பட்டுள்ளது” என்றார்.
இண்டியா கூட்டணி பொதுக் கூட்டத்தால் டெல்லி வர்த்தகர்களுக்கு ரூ.10 ஆயிரம் கோடி இழப்பு
📅
📍 Tamil Nadu, Tamil Nadu
🏷️ Business
✍️ TN24 Editorial Desk
🔗 Source: hindutamil.in (original report) ↗
