கிறிஸ்டியானோ ரொனால்டோ லிஸ்பன்: போர்ச்சுகல் கால்பந்து அணியின் நட்சத்திர வீரரான கிறிஸ்டியானோ ரொனால்டோ, சர்வதேச கால்பந்து போட்டிகளில் இருந்து ஓய்வு பெறுவதாக நேற்று அறிவித்தார். இதன் மூலம் அவரது 23 வருட சர்வதேச கால்பந்து பயணம் முடிவுக்கு வந்துள்ளது. 41 வயதான ரொனால்டோ, சமூக வலைதளத்தில் வெளியிட்ட வீடியோவில், “போர்ச்சுகல் மக்களே, நமது தேசிய அணியின் 7-ம் எண் ஜெர்சியைத் திருப்பி ஒப்படைக்கும் நாள் வந்துவிட்டது. அந்த ஜெர்சி எனக்கு மட்டுமே சொந்தமானது என்று நான் ஒருபோதும் நினைத்ததில்லை. ஆனால், கடந்த 23 ஆண்டுகளாக அதை அணிந்து விளையாடவும், பாதுகாக்கவும், உலகம் முழுவதும் உள்ள கால்பந்து மைதானங்களுக்கு எடுத்துச் செல்லவும் வாய்ப்பும் பொறுப்பும் எனக்குக் கிடைத்தது. தற்போது அந்த ஜெர்சியை எதிர்காலத் தலைமுறையிடம் ஒப்படைக்க வேண்டிய நேரம் வந்துவிட்டது. இது எளிதான முடிவு அல்ல. ஏனெனில், சில முடிவுகள் மனதால் மட்டுமே எடுக்கப்படுவதில்லை, இதயமும் அதில் முக்கியப் பங்கு வகிக்கிறது. 2003-ம் ஆண்டு ஆகஸ்ட் மாதம் தொடங்கி, எனது வாழ்க்கையையே நிரந்தரமாக மாற்றிய அந்தப் பயணம் தற்போது முடிவுக்கு வந்துள்ளது” எனத் தெரிவித்துள்ளார். கடந்த 2003-ம் ஆண்டு ஆகஸ்ட் மாதம் தனது 18வது வயதில் சர்வதேச கால்பந்தில் அறிமுகமான கிறிஸ்டியானோ ரொனால்டோ, 6 உலகக் கோப்பை தொடர்களில் விளையாடியுள்ளார். 2016-ம் ஆண்டு ஐரோப்பிய கால்பந்து சாம்பியன்ஷிப் போட்டியில் போர்ச்சுகல் அணி பட்டம் வெல்ல முக்கியப் பங்காற்றினார். 2019, 2025-ம் ஆண்டுகளில் நேஷன்ஸ் லீக் கோப்பைகளையும் போர்ச்சுகல் அணிக்கு வென்று கொடுத்தார். சர்வதேச கால்பந்தில் அதிக ஆட்டங்களில் விளையாடியவர், அதிக கோல்கள் அடித்தவர் என்ற சாதனைகளையும் அவர் தன்வசம் வைத்துள்ளார். போர்ச்சுகல் அணிக்காக 234 ஆட்டங்களில் விளையாடி 146 கோல்கள் அடித்துள்ளார். ‘இளைஞர்களின் உத்வேகம்’ ஓய்வு முடிவை அறிவித்துள்ள கிறிஸ்டியானோ ரொனால்டோவுக்கு போர்ச்சுகல் கால்பந்து கூட்டமைப்பு நன்றியையும், பாராட்டையும் தெரிவித்துள்ளது. இதுகுறித்து கூட்டமைப்பு வெளியிட்டுள்ள அறிக்கையில், “கிறிஸ்டியானோ ரொனால்டோ போர்ச்சுகல் நாட்டின் புகழை உலக அளவில் உயர்த்தியுள்ளார். அவரது பாதையைப் பின்பற்ற வேண்டும் என்ற கனவுடன் இருக்கும் பல தலைமுறை இளைஞர்களுக்கு அவர் உத்வேகமாகத் திகழ்கிறார். எங்களில் பலருக்கு அவர் எல்லா காலத்திலும் மிகச்சிறந்த கால்பந்து வீரர். நாட்டுக்காகப் பல சாதனைகளைப் படைத்த ரொனால்டோவுக்கு ரசிகர்களும், ஒட்டுமொத்த நாடும் மீண்டும் ஒருமுறை கரவொலி எழுப்பி தங்களது பாராட்டுகளைத் தெரிவிக்கும் வகையில் அவருக்கு சிறப்பான விழா நடத்தத் திட்டமிட்டுள்ளோம்” எனத் தெரிவித்துள்ளது. ஓய்வுக்கான காரணம் போர்ச்சுகல் அணியின் பயிற்சியாளர் ஜார்ஜ் ஜீசஸுடன் ஏற்பட்ட கருத்து வேறுபாடே ரொனால்டோவின் ஓய்வு முடிவுக்கு முக்கியக் காரணமாக அமைந்ததாகக் கூறப்படுகிறது. வேல்ஸ் அணிக்கு எதிராக கடந்த செப்டம்பர் 24-ம் தேதி நடைபெற்ற நேஷன்ஸ் லீக் ஆட்டத்தில் 1-0 என்ற கோல் கணக்கில் போர்ச்சுகல் வெற்றி பெற்றது. இதுவே ரொனால்டோ விளையாடிய கடைசி சர்வதேசப் போட்டியாக அமைந்தது. அதன்பிறகு நடைபெற்ற ஆட்டத்தில் ரொனால்டோ களமிறக்கப்படவில்லை. அடுத்த ஆட்டத்திலும் அவரை தொடக்க வீரராகக் களமிறக்கும் திட்டமில்லை என பயிற்சியாளர் தெரிவித்ததால், அணியின் பயிற்சி முகாமில் இருந்து ரொனால்டோ வெளியேறினார். இந்த விவகாரத்தில் ரொனால்டோவுக்கு தடையும், அபராதமும் விதிக்கப்பட்டு இருந்தது. 30 நாட்கள் தடை மற்றும் இந்திய மதிப்பில் ரூ.25 ஆயிரம் அபராதம் விதித்து போர்ச்சுகல் கால்பந்து சங்கம் நடவடிக்கை எடுத்து இருந்தது. 1,000 கோல் இலக்கு சர்வதேசப் போட்டிகளில் இருந்து ஓய்வு பெற்றாலும், கிளப் அணிகளுக்காக தொடர்ந்து விளையாட ரொனால்டோ திட்டமிட்டுள்ளார். சவுதி அரேபியாவின் அல் நஸர் அணிக்காக விளையாடி வரும் அவர், இந்த சீசன் முடிவில் கிளப் கால்பந்து வாழ்க்கையையும் நிறைவு செய்யக்கூடும் என எதிர்பார்க்கப்படுகிறது. இதுவரை தனது கால்பந்து வாழ்க்கையில் 985 கோல்கள் அடித்துள்ள ரொனால்டோ, 1,000 கோல்கள் என்ற மைல்கல்லை எட்டும் முனைப்பில் உள்ளார். 23 ஆண்டுகால சர்வதேசப் பயணத்தில் 146 கோல்கள், ஐரோப்பிய சாம்பியன் பட்டம், 6 உலகக் கோப்பை பங்கேற்புகள் என பல்வேறு சாதனைகளுடன் விடைபெறுகிறார் ரொனால்டோ.
சர்வதேச கால்பந்து போட்டியில் இருந்து ரொனால்டோ ஓய்வு: 23 ஆண்டுகால பயணம் நிறைவு
📅
📍 Tamil Nadu, Tamil Nadu
🏷️ Sports
✍️ TN24 Editorial Desk
🔗 Source: hindutamil.in (original report) ↗
