அமெரிக்க இடைக்காலத் தேர்தல் முடிவுகளில் ‘நீல அலை’ (ஜனநாயகக் கட்சியின் நிறம்) அடித்துக் கொண்டிருக்கிறது. மக்கள் பிரதிநிதிகள் அவை மற்றும் செனட் ஆகிய இரு அவைகளையும் ஜனநாயகக் கட்சி கைப்பற்றி இருப்பது, ஆளும் குடியரசுக் கட்சிக்கும், அதிபர் டொனால்டு ட்ரம்ப்புக்கும் மிகப் பெரிய அதிர்ச்சியை ஏற்படுத்தியுள்ளது. பணவீக்கம், பொருளாதார நெருக்கடி மற்றும் ஹிஸ்பானிக் வாக்காளர்களின் திடீர் மாற்றம் ஆகியவற்றால் குடியரசுக் கட்சி தனது பாரம்பரியக் கோட்டைகளை இழந்து வரலாற்றுத் தோல்வியைச் சந்தித்துள்ளது. மக்கள் அளித்த இந்தத் தீர்ப்பு அதிபர் ட்ரம்ப்பின் எஞ்சிய பதவிக் காலத்துக்கும், அமெரிக்காவின் உலகளாவிய வெளியுறவுக் கொள்கைகளுக்கும் ஒரு புதிய திருப்புமுனையை ஏற்படுத்தக்கூடும். நேட்டோ, சர்வதேச வர்த்தகம் மற்றும் ஈரான் போர், உக்ரைன் விவகாரங்கள் வரை சர்வதேச அரங்கிலும் எதிரொலிக்கும். குடியரசுக் கட்சியின் இரும்புக் கோட்டைகளாகக் கருதப்பட்ட பல மாகாணங்கள் இந்த இடைக்காலத் தேர்தலில் ஜனநாயகக் கட்சியின் பக்கம் சாய்ந்துள்ளன. அமெரிக்காவின் இந்த மாற்றம் உலகுக்குச் சொல்லும் செய்தி என்ன என்பதைப் பார்ப்போம். ஏமாற்றிய இடைக்காலத் தேர்தல் அமெரிக்காவின் இந்த இடைக்காலத் தேர்தலில் கிடைத்த முடிவு , அதிபர் டொனால்டு ட்ரம்ப்பின் குடியரசுக் கட்சிக்கு பேரிடியாக இறங்கியுள்ளது. குறைந்தபட்சம் செனட் சபையின் கட்டுப்பாட்டையாவது தக்கவைத்துக் கொள்ள முடியும் என்று குடியரசுக் கட்சியினர் நம்பினர். ஆனால், அவர்கள் பல மாகாணங்களில் சந்தித்த தோல்விகள், குறிப்பாக டெக்சாஸ், புளோரிடா மற்றும் தெற்கு கரோலினா போன்ற தீவிர குடியரசுக் கட்சி ஆதரவு மாகாணங்களில் கூட அவர்களை செனட் இடங்களை இழக்கச் செய்துள்ளது. இதில் ‘பாதுகாப்பானவை’ என்று நினைத்த இடங்களை இழந்ததுதான் குடியரசுக் கட்சிக்குப் பேரதிர்ச்சியாக இருக்கிறது. தோல்விக்கான காரணங்கள் அமெரிக்க இடைக்காலத் தேர்தல் தொடர்பாக ‘தி நியூயார்க் டைம்ஸ்’, ‘ராய்ட்டர்ஸ்’ முதலான செய்தி நிறுவனங்கள் மாதக் கணக்கில் வாக்காளர்களிடம் கருத்துக்கணிப்புகளை நடத்தின. அதில், “விலைவாசி உயர்வு, ஈரானில் அமெரிக்கா நடத்தும் போர், எரிபொருள் விலையேற்றம் மற்றும் ட்ரம்ப் அரசு நிர்வாகத்தின் கொள்கைகள்” எனப் பல்வேறு துறைகளின் செயல்பாடுகளில் மக்கள் மிகுந்த அதிருப்தியில் இருப்பது தெரியவந்தது. அதிலும், அகதிகள் விவகாரத்தில் ட்ரம்ப் காட்டிய கடுமை, பல்வேறு நாடுகள் மீது விதித்த கூடுதல் வரி மற்றும் தன்னிச்சையான முடிவுகள் ஆகியவற்றால் பாதிக்கப்பட்டது கடைநிலை சாமானிய மக்கள்தான் என்பது பிரதான விவாதமானது. எந்த இடைக்காலத் தேர்தலை விடவும் இந்தத் தேர்தல் மிகவும் முக்கியமானதாகும். காரணம், குடியரசுக் கட்சியின் கோட்டைகள் எனக் கருதப்பட்ட பல மாகாணங்களில் ஜனநாயகக் கட்சி வென்று இருப்பது பெரும் வியப்பை ஏற்படுத்தியுள்ளது. டெக்சாஸ் மாகாணத்தில் கடைசியாக 1998-ம் ஆண்டு ஜனநாயகக் கட்சியைச் சேர்ந்த ஒருவர் செனட்டராகத் தேர்ந்தெடுக்கப்பட்டார். அதன்பின்பு இந்தத் தேர்தலில்தான் ஜனநாயகக் கட்சியின் ஜேம்ஸ் டலாரிகோ (James Talarico) பிரம்மாண்ட வெற்றியைப் பதிவு செய்துள்ளார். ஹிஸ்பானிக் மக்களின் புறக்கணிப்பு: அமெரிக்காவின் பல மாகாணங்களில் ஹிஸ்பானிக் மக்கள் பெருமளவில் வசிக்கிறார்கள். ஐரோப்பாவில் உள்ள ஸ்பெயின் நாடுகளைச் சேர்ந்தவர்களும், அமெரிக்காவில் வாழும் லத்தீன் அமெரிக்க நாடுகளின் குடியேறிகள் அவர்களின் சந்ததியினரும் இதில் அடங்குவர். கடந்த காலங்களில் இவர்களை ட்ரம்ப் சற்று அந்நியமாகவே அணுகினார். இந்தத் தேர்தலில் ஜனநாயகக் கட்சியின் பிரம்மாண்ட வெற்றிக்கு ஹிஸ்பானிக் மக்களின் வாக்குகள் முக்கியக் காரணமாகக் கூறப்படுகிறது. இவர்கள் ஒட்டுமொத்தமாக ட்ரம்ப்பைப் புறக்கணித்து, ஜனநாயகக் கட்சிக்கு வாக்களித்துள்ளனர். கடுமையான குடியேற்றக் கொள்கைகள், அகதிகளை வெளியேற்றும் நடவடிக்கைகள் மற்றும் அத்தியாவசிய பொருட்களின் விலை உயர்வு ஆகியவை ஹிஸ்பானிக் சமூகத்தினரைப் பெரிதும் பாதித்தன. இதனால் டெக்சாஸ், புளோரிடா போன்ற மாநிலங்களில் வரலாற்று ரீதியாக நிலவி வந்த ஆதரவு நிலையை மாற்றி, ஜனநாயகக் கட்சி வேட்பாளர்களுக்கு ஹிஸ்பானிக் மக்கள் பெருமளவில் வாக்களித்தனர். செனட், நாடாளுமன்றத்தை யார் கைப்பற்றுவார்? நாடாளுமன்றம் (மக்களவை - House of Representatives): மக்கள் பிரதிநிதிகள் அவையில் ஜனநாயகக் கட்சி பெரும்பான்மை இடங்களைப் பெற்றுள்ளது. ஒட்டுமொத்தமாக உள்ள 435 இடங்களுக்கு நடந்த தேர்தலில், ஜனநாயகக் கட்சியினர் (புதன்கிழமை மாலை 4 மணி வரை) 222 இடங்களில் வென்று பெரும்பான்மை பெற்றுள்ளனர். குடியரசுக் கட்சியினர் 138 இடங்களில் வென்றுள்ளனர். செனட் (மேல்சபை): குடியரசுக் கட்சியின் வலுவான கோட்டைகளாகக் கருதப்பட்ட டெக்சாஸ், தெற்கு கரோலினா, அயோவா மற்றும் கேன்சாஸ் போன்ற மாநிலங்களிலும் ஜனநாயகக் கட்சி வேட்பாளர்கள் வெற்றி பெற்று, செனட் அவையையும் கைப்பற்றியுள்ளனர். 35 இடங்களுக்கு நடந்த தேர்தலில் ஜனநாயகக் கட்சி 20 இடங்களில் வென்று, தங்கள் பலத்தை 54 ஆக உயர்த்தியுள்ளது. இதுவரை 13 இடங்களில் வென்றிருக்கும் குடியரசுக் கட்சியின் பலம் 44 ஆகக் குறைந்துள்ளது. உலகுக்கு உரைக்கும் செய்தி: இந்தத் தேர்தல் முடிவுகளின் தாக்கம் உலகின் பிற பகுதிகளில் உடனடியாக எதிரொலிக்காமல் இருக்கலாம். குடியரசுக் கட்சி தேர்தலில் பின்னடைவைச் சந்தித்திருந்தாலும், 2028-ம் ஆண்டு வரை ட்ரம்ப்பே அதிபராக தொடர்வார். இருப்பினும், ட்ரம்ப்பின் எஞ்சிய பதவிக் காலம் அவருக்குச் சவாலானதாகவே அமையும். நாடாளுமன்றத்தின் இரு அவைகளும் தற்போது ஜனநாயகக் கட்சியின் வசமாகி இருப்பதால் இனி ட்ரம்ப் பிறப்பிக்கும் எந்தவொரு உத்தரவும் அவ்வளவு எளிதில் சட்டமாக முடியாது. இனிமேல் அதிபர் ட்ரம்ப் தனது நிர்வாக அதிகாரத்தைப் பயன்படுத்தி சில உத்தரவுகளை வேண்டுமானால் பிறப்பிக்கலாம். ஆனால், அந்த உத்தரவுகளைச் சட்டமாக்குவது அவ்வளவு எளிதாக இருக்கப்போவது இல்லை. ஈரானுடன் நடத்தி வரும் போர், இஸ்ரேல் மீதான பிடிப்பு, மென்பொருள் நிறுவனங்களுக்கு அளித்த சலுகைகள் மற்றும் ஒப்பந்தங்கள் எனப் பல்வேறு விவகாரங்களை ஜனநாயகக் கட்சியினர் இனி தோண்டி எடுத்து விசாரணை வளையத்துக்குள் கொண்டுவருவார்கள். பொதுவாக அமெரிக்காவில் இடைக்காலத் தேர்தலுக்குப் பின் அதிபரின் கவனம் வெளியுறவு விவகாரங்களில் திரும்புவது வழக்கம். அந்தவகையில், இனிமேல் அதிபர் ட்ரம்ப்பின் வெளியுறவுக் கொள்கையில் பெரிய மாற்றங்களை எதிர்பார்க்கலாம். சட்டரீதியாகப் பார்த்தால், அதிபரின் செயல்பாடுகளைத் தடுக்கும் அதிகாரம் நாடாளுமன்றத்துக்கு முழுமையாக உண்டு. ஒருவேளை அதிபரின் செயல்களைத் தடுக்கும் வகையில் ஜனநாயகக் கட்சியினர் செயல்பட்டால், ட்ரம்ப் தனது ‘வீட்டோ’ (மறுப்பு) அதிகாரத்தைப் பயன்படுத்துவது உறுதி. அதை முறியடிக்க மூன்றில் இரண்டு பங்கு பெரும்பான்மை தேவைப்படும். எனவே, இந்தத் தேர்தல் தோல்வி, ட்ரம்ப்பைக் கட்டுப்படுத்த ஜனநாயகக் கட்சியினருடன் இணைந்து செயல்படும் அளவுக்குக் குடியரசுக் கட்சி உறுப்பினர்களை யோசிக்க வைக்குமா என்பதே இப்போதைய முக்கியமான கேள்வி. ஜனநாயகக் கட்சியினரால் நிச்சயமாகச் செய்யக்கூடிய ஒரு காரியம், ட்ரம்ப் நிர்வாகத்தின் செயல்பாடுகள் மற்றும் அதன் சில அதிகாரிகள் மீது பல்வேறு விசாரணைகளைத் தொடங்குவதுதான். அரசியல் ரீதியாகப் பலவீனமடைந்து, கடும் கோபத்தில் இருக்கும் ட்ரம்ப், தனது விரக்தியை வெளிநாடுகளில் வெளிப்படுத்தத் தீர்மானிக்கக்கூடும் என்ற சாத்தியத்துக்கு உலகம் தன்னைத் தயார்படுத்திக் கொள்ள வேண்டும்.
ட்ரம்ப்பின் தேர்தல் வீழ்ச்சியும், சர்வதேச அரசியல் தாக்கமும் - ஒரு தெளிவுப் பார்வை
📅
📍 Tamil Nadu, Tamil Nadu
🏷️ Politics
✍️ TN24 Editorial Desk
🔗 Source: hindutamil.in (original report) ↗
