பட மூலாதாரம், Getty Images அமெரிக்க துணை அதிபர் ஜே.டி. வான்ஸ், புதன்கிழமை வாஷிங்டனில் அரசியல் வட்டாரத்தில் பெரும் பரபரப்பை ஏற்படுத்தினார். இடைக்காலத் தேர்தலில் குடியரசுக் கட்சி தோல்வியடைந்தமைக்கு இரான் போரே நேரடிக் காரணம் என்று அவர் குற்றம் சாட்டினார். 2028ஆம் ஆண்டு அதிபர் தேர்தலில் போட்டியிடக்கூடும் என்று எதிர்பார்க்கப்படும் நிலையில், டொனால்ட் டிரம்பிடம் இருந்து தன்னைத் தனித்துக் காட்டிக்கொள்ளும் முயற்சியாகவே அவர் இவ்வாறு பேசியிருக்கலாம் என்று பரவலாகக் கருதப்படுகிறது. 'எக்ஸ்' தளத்தில் சுமார் 600 சொற்கள் கொண்ட விரிவான அறிக்கை ஒன்றை வான்ஸ் வெளியிட்டார். அதில், 2024ஆம் ஆண்டு டிரம்புக்கு ஆதரவளித்த வாக்காளர்கள் இம்முறை இடைக்காலத் தேர்தலில் குடியரசுக் கட்சிக்கு ஆதரவளிக்கவில்லை என்பதை அவர் ஒப்புக் கொண்டார். "நாம் தோல்வியடைந்தமைக்குக் காரணம் இந்தப் போர்தான். இதை அதிபரே நேற்றிரவு குறிப்பிட்டார்" என்று அவர் தனது பதிவில் எழுதியிருந்தார். செவ்வாய்க்கிழமை இரவு மற்றும் புதன்கிழமை அளித்த நேர்காணல்களில், இரான் மீது அமெரிக்கா மேற்கொண்ட போரை டிரம்ப் தொடர்ந்து நியாயப்படுத்தினார். அதேநேரத்தில், அமெரிக்க நாடாளுமன்றத்தின் பிரதிநிதிகள் சபை, செனட் சபை ஆகிய இரண்டிலும் ஜனநாயகக் கட்சியினர் பெரும்பான்மையைப் பெறுவதற்கு இந்தப் போரும் ஒரு காரணமாக அமைந்தது என்பதை அவர் ஒப்புக்கொண்டார். இரான் போர் தொடர்பாக வான்ஸ் கொண்டுள்ள நிலைப்பாடு வாஷிங்டன் அரசியல் வட்டாரத்தில் ஏற்கெனவே அறியப்பட்ட ஒன்றுதான். இந்த ஆண்டு பிப்ரவரி மாதத்தில் அமெரிக்காவும் இஸ்ரேலும் தெஹ்ரான் மீது தாக்குதல் நடத்தியதில் இருந்து, அவர் பொதுவெளியில் இந்தப் போரை ஆதரித்து வந்துள்ளார். ஆனால், அரசாங்கத்தின் உயரதிகாரிகளுடனான தனிப்பட்ட ஆலோசனைகளின்போது இந்தப் போருக்கு அவர் எதிர்ப்பு தெரிவித்ததாகக் கூறப்படுகிறது. இதுவரை பொதுவெளிக்கு வராமல் இருந்த டிரம்ப் மற்றும் வான்ஸ் இடையிலான இந்தக் கருத்து வேறுபாடு, இப்போது வெளிப்படையாகத் தெரியத் தொடங்கியுள்ளது. பட மூலாதாரம், Getty Images டிரம்பும் குடியரசுக் கட்சியும் தேர்தலில் பெரும் தோல்வியைச் சந்தித்த சில மணிநேரத்திலேயே, இரான் போரில் ஈடுபட எடுத்த முடிவு அரசியல் ரீதியாகத் தவறானது என்பதை வான்ஸ் வெளிப்படையாகச் சுட்டிக்காட்டினார். "இந்தப் போர் அவசியமானது என்றும், அதற்காக அடுத்த ஆறு ஆண்டுகளுக்கு செனட் சபையில் பெரும்பான்மையை இழப்பது நியாயமான விலை என்றும் நீங்கள் வாதிட விரும்பினால், தாராளமாக வாதிடுங்கள். இந்த இழப்பு ஏற்றுக் கொள்ளத்தக்கது என்று கூறுங்கள். உங்கள் கருத்துடன் மற்றவர்கள் உடன்படுகிறார்களா இல்லையா என்பது வேறு விஷயம். குறைந்தபட்சம் அது நேர்மையான நிலைப்பாடாக இருக்கும்" என்று வான்ஸ் குறிப்பிட்டார். End of அதிகம் படிக்கப்பட்டது பிபிசி தமிழ் செய்திகளை செல்போனிலேயே படிக்கலாம் பின்தொடர கிளிக் செய்யவும் வாட்ஸ்அப் விளம்பரம் - முடிவு வான்ஸின் இந்தக் கருத்து அரசியல்ரீதியாக மிகவும் முக்கியத்துவம் வாய்ந்தது. சமீப கால அமெரிக்க அரசியல் வரலாற்றில், பதவியில் இருக்கும் துணை அதிபர் ஒருவர், வெளியுறவுக் கொள்கையின் மிக முக்கியமான விவகாரத்தில் அதிபரின் முடிவை இவ்வளவு வெளிப்படையாகவும் கடுமையாகவும் விமர்சித்திருப்பது அரிதானது. இதற்குப் பிறகு மேலும் வியப்பூட்டும் ஒரு நிகழ்வு நடந்தது. தனது நெருங்கிய ஆலோசகர்களிடம் இருந்து முழுமையான விசுவாசத்தை எதிர்பார்க்கும் டிரம்ப், இடைக்காலத் தேர்தல் முடிவுகளைத் தீர்மானித்ததில் இரான் போர் முக்கியப் பங்கு வகித்தது என்ற வான்ஸின் கருத்தை ஏற்றுக்கொண்டார். அதே சூழல் மீண்டும் ஏற்பட்டாலும், தான் "அதே முடிவைத்தான் மீண்டும் எடுப்பேன்" என்றும் அவர் உறுதியாகத் தெரிவித்தார். வான்ஸ் தனது அரசியல் எதிர்காலத்திற்காகத் தனித்த நிலைப்பாட்டை எடுக்க டிரம்ப் இடமளிக்கக்கூடும் என்பதற்கான ஆரம்ப அறிகுறியாக இது பார்க்கப்படுகிறது. குறிப்பாக, வான்ஸ் எதிர்காலத்தில் அதிபர் தேர்தலில் போட்டியிட முடிவு செய்தால், அவருக்கு அதிக அரசியல் சுதந்திரம் அளிக்கப்படலாம் என்ற எதிர்பார்ப்பும் எழுந்துள்ளது. போர் தொடர்பாக வான்ஸ் தெரிவித்த கருத்து குறித்து செய்தியாளர்கள் கேட்டபோது, டிரம்ப், "அவர் இதைப் பற்றி என்ன நினைக்கிறார் என்பது எனக்குத் தெரியும். அதில் தவறில்லை என்றே எனக்குத் தோன்றுகிறது. போரைத் தொடங்கியபோதே இதன் விளைவுகள் எனக்குத் தெரியும். இரானை அணு ஆயுதம் தயாரிப்பதில் இருந்து தடுத்துள்ளோம். இனி அவர்களால் ஒருபோதும் அணு ஆயுதத்தைப் பெற முடியாது" என்று பதிலளித்தார். வான்ஸின் இந்தக் கருத்து, "டிரம்பிடம் இருந்து தன்னைத் தனித்துக் காட்டிக்கொள்ள அவர் மேற்கொள்ளும் முயற்சியாகத் தெரிகிறது" என்று மூலோபாய மற்றும் சர்வதேச ஆய்வுகளுக்கான மையம் (Center for Strategic and International Studies) அமைப்பின் வெளியுறவுக் கொள்கை நிபுணர் டேனியல் பைமன் தெரிவித்தார். பட மூலாதாரம், Reuters வான்ஸ் அதிபர் தேர்தலில் போட்டியிட விரும்பினால், டிரம்புடன் கருத்து வேறுபாடுகளை வெளிப்படுத்துவதும், அதேநேரத்தில் அவருடனான உறவைப் பாதிக்காமல் பார்த்துக் கொள்வதும் சவாலானதாக இருக்கும் என்று பைமன் மேலும் கூறினார். வான்ஸ் வெளியிட்ட பதிவிலும் இந்த நுட்பமான அணுகுமுறை வெளிப்பட்டது. அவர் டிரம்பின் பெயரை நேரடியாகக் குறிப்பிடவில்லை. மேலும், தேர்தல் முடிவுகள் குறித்த தனது பெரும்பாலான விளக்கங்களுக்கு, பெயர் குறிப்பிடப்படாத கருத்துக் கணிப்பாளர்களின் மதிப்பீடுகளை ஆதாரமாகக் காட்டினார். "எதிர்காலத்தில் அவர் என்ன செய்யத் திட்டமிட்டிருக்கிறார் என்பதற்கான முன்னோட்டத்தை வான்ஸ் அளித்துள்ளார்" என்று குடியரசுக் கட்சியின் அரசியல் வியூக நிபுணர் ஆஷ்லி டேவிஸ் பிபிசியிடம் தெரிவித்தார். இரான் போர் மீதான விமர்சனத்துடன் வான்ஸ் நின்றுவிடவில்லை. எதிர்கால அதிபர் தேர்தலை முன்னிட்டு, வாக்காளர்களின் ஆதரவை மீண்டும் பெறுவதற்கான அரசியல் செயல்திட்டத்தையும் அவர் முன்வைத்தார். கட்சியின் அணுகுமுறையை நான்கு முக்கிய அம்சங்களாக அவர் வகைப்படுத்துகிறார்: தேசிய அரசியலில் நுழைந்தது முதல் வான்ஸ் தொடர்ந்து வலியுறுத்தி வந்த பல கருத்துகள் இந்த நான்கு அம்சங்களிலும் இடம்பெற்றுள்ளன. இவை, எதிர்கால அதிபர் தேர்தல் பிரசாரத்தில் அவர் முன்வைக்கக் கூடிய முக்கிய வாதங்களின் சுருக்கமாகவும் அமைந்துள்ளன. பட மூலாதாரம், Andrew Harnik/Getty Images இந்த விவகாரம் குறித்து கருத்து கேட்பதற்காக பிபிசி, வான்ஸின் அலுவலகத்தைத் தொடர்புகொண்டது. அடுத்த அமெரிக்க அதிபர் தேர்தலுக்கு இன்னும் இரண்டு ஆண்டுகள் உள்ளன. அந்தத் தேர்தலில் வான்ஸ் போட்டியிடுவார் என்று எதிர்பார்க்கப்பட்டாலும், அவர் இதுவரை அதிகாரபூர்வமாக எந்த முடிவையும் அறிவிக்கவில்லை. இது குறித்து அவர் தொடர்ந்து ஆலோசித்து வருவதாக அவரது உதவியாளர்கள் தெரிவிக்கின்றனர். டிரம்பின் நிலைப்பாட்டில் இருந்து வான்ஸ் எந்த அளவுக்கு விலகிச் சென்றுள்ளார் என்பது இன்னும் விவாதத்திற்குரிய விஷயமாகவே உள்ளது. 'நியூயார்க் டைம்ஸ்' நாளிதழின் தகவல்படி, தனது கருத்துகளை இணையத்தில் வெளியிடுவதற்கு முன்பே அந்தப் பதிவை வான்ஸ் டிரம்பிடம் காட்டியுள்ளார். அதேநேரத்தில், டிரம்ப் தனது நிலைப்பாட்டை மாற்றிக் கொள்ளவும் வாய்ப்புள்ளது. மேலும், வான்ஸ் உள்ளிட்ட எவரும் தனது முடிவுக்கு எதிராகச் செயல்படுவதை அவர் அனுமதிக்க மாட்டார் என்பதை வெளிப்படுத்தவும் கூடும். 2028ஆம் ஆண்டு அதிபர் தேர்தலில் குடியரசுக் கட்சியின் வேட்பாளராகத் தனக்குப் பிறகு யாரை ஆதரிக்கப் போகிறார் என்பது குறித்து டிரம்ப் இதுவரை தெளிவான அறிவிப்பு எதையும் வெளியிடவில்லை. வான்ஸ், வெளியுறவுத் துறை அமைச்சர் மார்கோ ரூபியோ ஆகிய இருவரையும் அவர் பலமுறை பாராட்டியுள்ளார். இருப்பினும், இவர்களில் யாரையேனும் ஆதரிக்கப் போகிறாரா என்பது குறித்தும் அவர் எதுவும் தெரிவிக்கவில்லை. தனக்குப் பிறகு தனது அரசியல் இயக்கத்தை யார் வழிநடத்துவார்கள் என்பதை டிரம்ப் இன்னும் தெளிவுபடுத்தவில்லை. இதனால், அவருக்குப் பிறகு அந்தப் பொறுப்பை ஏற்கப் போவது யார் என்ற ஊகங்கள் தொடர்ந்து எழுந்து வருகின்றன. அமெரிக்க அரசியலமைப்புச் சட்டத்தின்படி ஒருவர் இரண்டு முறைக்கு மேல் அதிபராக முடியாது. ஆனால், அந்தத் தடையையும் மீறி மூன்றாவது முறையாக அதிபர் தேர்தலில் போட்டியிடுவது குறித்துப் பேசியுள்ளார் டிரம்ப். இடைக்காலத் தேர்தலின்போது வான்ஸ் வெளியிட்ட இந்தக் கருத்துகள், காலப்போக்கில் முக்கியத்துவம் இழக்கக்கூடும். அல்லது, 2028 அதிபர் தேர்தலுக்கான போட்டியின் தொடக்கமாகவும், டிரம்புக்கு பிந்தைய குடியரசுக் கட்சியின் தலைமைப் பொறுப்பைக் கைப்பற்றுவதற்கான போட்டியின் முதல் அறிகுறியாகவும் அமையலாம். கூடுதல் தகவல் சேகரிப்பு: நார்டின் சாட் - இது, பிபிசிக்காக கலெக்டிவ் நியூஸ்ரூம் வெளியீடு குறுங்காணொளிகள் முடிவு
இரான் போரை விமர்சித்த ஜே.டி. வான்ஸ் - டிரம்பின் அரசியல் வாரிசுக்கான போட்டி தொடங்கிவிட்டதா?
